Adina Ioana Vladu

Adina Ioana Vladu é licenciada en Filoloxía Inglesa e Filoloxía Hispánica pola Universidade de Bucarest (UB), na que tamén cursou o mestrado en Filoloxía Románica finalizado cunha tesiña sobre a normalización do galego (2009) e pola que obtivo o título de doutora en Filoloxía cunha tese de lingüística comparada en 2012.

En 2007 comezou a colaborar co Departamento de Lingüística Románica, Linguas e Literaturas Iberrorománicas e Italiano da Universidade de Bucarest e dende 2008 ata 2013 foi docente no mesmo departamento.

Completou a súa formación en áreas diversas cun contrato de investigación posdoutoral na Universidade de Salamanca (2013), onde elaborou un traballo comparativo de investigación sobre creación lingüística e neoloxía, co mestrado en Estudos Ingleses Avanzados e as súas Aplicacións da USC finalizado cunha tesiña na área da lingüística de corpus (2021) e cunha bolsa de investigación en terminoloxía no Centro Ramón Piñeiro de Investigación en Humanidades (2019-2021).

Os seus intereses de investigación céntranse na morfoloxía derivativa, lingüística de corpus, lexicografía, terminoloxía e tradutoloxía. Actualmente traballa como investigadora colaboradora no Proxecto Nós.