Montserrat Recalde Fernández

Son Licenciada con grao en Filoloxía Hispánica (1992). Dende 1997 son profesora contratada no Departamento de Lingua e Literatura Españolas, Teoría da Literatura e Lingüística Xeral da Universidade de Santiago de Compostela. No 2022 obtiven o título de doutora cunha tese sobre as actitudes e ideoloxías lingüísticas arredor da gheada e o seseo.

A miña investigación oriéntase cara á sociolingüística e a análise do discurso, especialmente o estudo das actitudes e ideoloxías lingüísticas, o contacto de linguas ou a lingüística folk.

Participei no proxecto de investigación Mapa sociolingüístico de Galicia do Seminario de Sociolingüística da Real Academia Galega, baixo a coordinación de Mauro Fernández e Modesto Rodríguez. Como resultado desa investigación son coautora dos volumes monográficos Lingua inicial e competencia lingüística en Galicia (1994), Usos lingüísticos en Galicia (1995),  Actitudes lingüísticas en Galicia (1995). Tamén participei no Proyecto Sociolingüístico para el Español de España y América (PRESEEA) (2007-2015), coordinado por Francisco Moreno, e nos proxectos para a formación dun corpus de español oral de Galicia ESLORA, ESLORA2, ESLORA+ e ESLORA++  (https://eslora.usc.es/), dirixidos por Guillermo Rojo e Victoria Vázquez.